08/02/2019

ნავთობპროდუქტების იმპორტიორმა და დისტრიბუტორმა საქართველოში, კომპანია “ფრეგომ”, 2018 წლის ივლისში დაწყებული “ბიოდიზელის” პროექტის ფარგლებში, პირველად საქართველოსა და რეგიონში დანერგა განახლებად ბიორესურსებზე დამყარებული საწვავის - ბიოდიზელის წარმოება, რომელიც, ნავთობდიზელისგან განსხვავებით, არ აბინძურებს ატმოსფეროს და მსოფლიოში ყველაზე სუფთა და ეკომეგობრულ საწვავად არის მიჩნეული. 

ბიოდიზელის წარმოების ტექნოლოგია და ეკონომიკური მოდელი ილიაუნის მეცნიერებმა 2015 წელს ამერიკულ გამოცდილებაზე დაყრდნობით შეიმუშავეს. დაინახა რა ის ეკოლოგიური და ეკონომიკური სიკეთე, რასაც ბიოდიზელის წარმოება მოუტანდა ქვეყანას, “ფრეგომ”  საკუთარი სოციალური პასუხისმგებლობის ფარგლებში, გადაწყვიტა ილიაუნის საპილოტე პროექტის კომერციალიზაცია და ნახევარმილიონიანი ინვესტიციით ააშენა და აღჭურვა ბიოდიზელის საწარმო, რომელშიც ორი ათეული ადამიანი დასაქმდა.

აღსანიშნავია, რომ საწარმოს მუშაობის შედეგად ყოველთვიურად იზოგება 27-28 ტ. ნახშირორჟანგის ემისია ატმოსფეროში; რამდენადაც ბიოდიზელის წარმოება დაფუძნებულია ნარჩენი ბიორესურსების, კერძოდ, მეორადი საკვები ზეთების გადამუშავებაზე, პროექტი ორმაგ ეკოლოგიურ ეფექტს იძლევა _ ერთი მხრივ, ამცირებს ნავთობპროდუქტების მოხმარებით გამოწვეულ უარყოფით გავლენას, ხოლო მეორე მხრივ – ხელს უწყობს თხევადი ნარჩენების გონივრულ მართვას და უტილიზაციას.

ენერგომომარაგების წყაროების დივერსიფიცირებით ბიოდიზელის წარმოება ეხმარება ქვეყნის ენერგოდამოუკიდებლობას.

მდგრადი განვითარების მეშვიდე მიზნის, რომელიც ხელმისაწვდომ და უსაფრთხო ენერგიას ეხება, ერთ-ერთი ამოცანაა:

• 2030 წლისათვის საერთაშორისო თანამშრომლობის გაძლიერება სუფთა ენერგიის ხელმისაწვდომობის უზრუნველყოფასთან დაკავშირებული კვლევისა და ტექნოლოგიების სფეროში, მათ შორის განახლებადი ენერგიების, ენერგოეფექტურობის და სუფთა წიაღისეული საწვავის ტექნოლოგიის სფეროში, და ინვესტიციების ხელშეწყობა ენერგეტიკულ ინფრასტრუქტურასა და სუფთა ენერგიის ტექნოლოგიებში.

ასე, რომ ნავთობპროდუქტების იმპორტიორი და დისტრიბუტორი საქართველოში, კომპანია “ფრეგო” სწორედ აღნიშნული მიზნის განვითარებას უწყობს ხელს, რაც კიდევ ერთი წინგადადგმული ნაბიჯია მდგრადი განვითარების მიზნების მიღწევაში.

ელენე ჩხეიძე