ყოველი კომპანიის თავდაპირველი, ძირითადი ფუნქციაა აწარმოოს პროდუქცია და სერვისები, იყოს მდგრადი და მომგებიანი. კორპორაციული სოციალური პასუხისმგებლობა არ მოდის წინააღმდეგობაში ამ ძირითად ფუნქციასთან, არამედ პირიქით, ხელს უწყობს და განამტკიცებს მას.
მოსაზრება, რომ ეკონომიკური მიზნები წინააღმდეგობაში მოდის სოციალურ და გარემოსდაცვით მიზნებთან და, შესაბამისად, კორპორაციული პასუხისმგებლობა ფუფუნებაა - ეს მოსაზრება ძალიან მოძველებულია და რეალობას აღარ შეესაბამება.
თანამედროვე მსოფლიოში კორპორაციული პასუხისმგებლობა წარმოადგენს ახალი ბიზნეს მოდელის განუყოფელ ნაწილს.
მენეჯმენტის თანამედროვე თეორიები ეფუძნება მოსაზრებას, რომ პასუხისმგებელი კომპანიები გრძელვადიან პერსპექტივაში უფრო წარმატებულები არიან.
მომხმარებლები, თანამშრომლები, ინვესტორები, მთავრობა, საერთაშორისო ორგანიზაციები და საზოგადოება სულ უფრო დაჟინებით ითხოვენ და მოელიან კომპანიებისაგან პასუხისმგებელ და ეთიკურ ქცევას, მდგრადი განვითარების მიზნების მხარდაჭერას. თანამედროვე დიგიტალიზებულ „გამჭვირვალე“ სამყაროში, რომელშიც ინფორმაცია კომპანიების საქმიანობისა და ზეგავლენების შესახებ ადვილად ხელმისაწვდომია; კომპანიის რეპუტაცია, მომხმარებელთა და თანამშრომელთა ლოიალობა, ფინანსებზე ხელმისაწვდომობა და წარმატება სულ უფრო მეტად არის დამოკიდებული მის მიერ კორპორაციული პასუხისმგებლობის სტანდარტების განხორციელებაზე.
კომპანიებისთვის კორპორაციული პასუხისმგებლობა არის სტრატეგიული მიდგომა, რაც ეხმარება მათ გააუმჯობესონ ურთიერთობა სხვადასხვა დაინტერესებულ მხარესთან, გახდნენ უფრო მდგრადები, ეფექტურები, კონკურენტუნარიანები და ამ გზით გაზარდონ საკუთარი ბიზნესის წარმატება და ასევე სარგებელი მოუტანონ საზოგადოებას.
73%
მოსახლეობის 73% გლობალურად თვლის, რომ კომპანიებს შეუძლიათ განახორციელონ პასუხისმგებელი საქმიანობა, რაც ერთდროულად გაზრდის მათ მოგებას და გააუმჯობესებს საზოგადოების სოციალურ და ეკონომიკურ მდგომარეობას.
