18/07/2020

ანალიზისა და სტრატეგიული კონსულტაციის კომპანიამ „ეისითი“, მცირე და საშუალო ბიზნესის მხარდასაჭერად, ახალი სტრატეგიული საკონსულტაციო პლატფორმა ACT-STRATEGIST.GE შექმნა, რომელიც დაინტერესებულ მხარეებს სხვადასხვა მიმართულებით ონლაინ კონსულტირების მიღების შესაძლებლობას აძლევს. 

COVID-19-ის პანდემიის გამო მსოფლიოსა და საქართველოში შექმნილი რეალობა მცირე და საშუალო ბიზნესს ერთ-ერთ ყველაზე მოწყვლადს ხდის. არსებულ კრიზისში, სწორედ ახალ გამოწვევებთან გამკლავებაში მათ მხარდაჭერას და გაძლიერებას ისახავს მიზნად ახალი პლატფორმა, სადაც „ეისითი“-ს, მისი შვილობილი და პარტნიორი კომპანიების გამოცდილი კონსულტანტები კომპანიებს უფასო კონსულტაციას გაუწევენ საკუთარი პროფილის შესაბამისად. მცირე და საშუალო ბიზნესის წარმომადგენლებს შეუძლიათ ისარგებლონ 2 უფასო საკონსულტაციო საათით ნებისმიერი მიმართულებით. თუმცა, პლატფორმა საშუალებას იძლევა კომპანიებმა, საჭიროების შემთხვევაში, განაგრძონ კონულტაციების მიღება შექმნილი ვითარების გათვალისწინებით დადგენილი უპრეცედენტოდ შეღავათიანი ტარიფით.

ახალ პლატფორმაზე ონლაინ კონსულტაციების მიღება შეიძლება შემდეგი მიმართულებებით:

• ბიზნესის განვითარების სტრატეგია;
• ზოგადი მენეჯმენტი;
• ლიდერობა და ორგანიზაციული განვითარება;
• კრიზისის მენეჯმენტი;
• იურიდიული კონსულტაცია;
• ბიზნეს- ქოუჩინგი (ინდივიდუალური & გუნდური);
• კრიზისული კომუნიკაცია;
• სტრატეგიული HR-ი და თანამშრომელთა მოტივაცია;
• სტრატეგიული მარკეტინგი და კომუნიკაციები;
• IT ინფრასტრუქტურის გამართვა;
• ოფისებისა და ქოლ-ცენტრების დისტანციური მართვა;
• კიბერუსაფრთხოება;
• სხვა ბიზნეს მიმართულებები.

ვებ-პლატფორმით კონსულტაციების მიღება მარტივადაა შესაძლებელი act-strategist.ge-ზე კონსულტანტის, საკონსულტაციო მიმართულების არჩევისა და შესაბამისი სარეგისტრაციო ფორმის შევსების შემდეგ. პლატფორმა 2020 წლის 6 აპრილიდან ფუნქციონირებს და მისი საშუალებით კონსულტაცია სხვადასხვა მიმართულებით უკვე 10-მდე კომპანიის წარმომადგენლებმა მიიღეს.

წყარო: www.interpressnews.ge