02/04/2025

„მთაში საქმიანობას სხვა გამოწვევებთან ერთად ერთი მთავარი პრობლემა, მკაცრი კლიმატური პირობების არსებობა ახლავს თან. ზამთარში ჩემი მუდმივი სადარდებელია რომ გზა დროულად გაიწმინდოს,  მარილი დაიყაროს, დენი იყოს, წყალი არ გაიყინოს და ა.შ

არის როცა - 25 გრადუსია, ყველაფერი იყინება, ხან რა ფუჭდება ხან რა...რთულია, მაგრამ ვუმკლავდები.“                                                                            

ელენე განაია მეწარმე ქალია, რომელმაც შეძლო და მესტიაში სრულიად მარტომ განავითარა ბიზნესი, რომელიც ეკო ტურიზმის მოყვარულთათვის ერთ-ერთ საყვარელ ადგილად იქცა. სვანეთში მოგზაურობისას მასაც შევხვდით და ვთხოვეთ გაეზიარებინა გამოცდილება. 

„ყველაფერი იმით დაიწყო, რომ ძალიან მოულოდნელად შევიძინე მიწა, მესტიაში. ბევრი იდეა მქონდა... ვფიქრობდი რისი გაკეთება შემეძლო, რა გაამართლებდა... ბოლოს ამ ხის კოტეჯების აშენება გადავწყვიტე, ვიცოდი განსაკუთრებით შეესაბამებოდა აქაურ ლანდშაფტს ასეთი კონცეფციის სივრცეები. სესხის მეშვეობით შევძელი რომ ეს კოტეჯები ამეშენებინა, მომეწესრიგებინა და სისრულეში მომეყვანა ჩემი გეგმები. 

ელენე, ძირითადად ვინ არიან თქვენი სტუმრები? 

Wooden Huts-ში ჰაიკინგის, ლაშქრობის, სათავგადასავლო ტურიზმის მოყვარული ხალხი მოდის. დავაკვირდი, რომ ამ სეგმენტისთვის ცენტრიდან მოშორებით ყოფნა და ბუნებასთან სიახლოვე პრიორიტეტულია. სწორედ ეს გამოარჩევს ჩვენს სივრცეს... განსაკუთრებული სიმშვიდეა, რადგან ფაქტობრივად ტყეშია ჩვენი კოტეჯები. 

ელენე, რა ეკო-მეგობრული ფაქტორები გაითვალისწინეთ მშენებლობისას და თუნდაც ახლა, რას ითვალისწინებთ საქმიანობისას? 

თავიდანვე ვეცადე რომ ეკოლოგიურად სუფთა მასალები გამოგვეყენებინა. ხე, ალუმინის კარ-ფანჯარა... მინიმუმამდე შევამცირეთ პლასტმასის გამოყენება. 

ასევე უნდა ითქვას, რომ კანალიზაციის სეპტიკები გვაქვს, არ ვაბინძურებთ გარემოს. წყალიც თავად შემოვიყვანე, მინერალური წყლები, სუფთა და ჯანსაღი. 

კიდევ ერთი ძალიან მნიშვნელოვანი რაცაა სახანძრო უსაფრთხოების სისტემა გვაქვს, რადგან არასასიამოვნო ფაქტმა გვიბიძგა, რომ ამაზე სერიოზულად გვეზრუნა. კოტეჯების გახსნიდან ორ თვეში  ერთ-ერთი კოტეჯი დაიწვა, რამაც მნიშვნელოვანი ზიანი მოგვაყენა, მაგრამ ხალხის მხარდაჭერით ეს დაბრკოლება გადავლახე. 

GRETA -ს პროექტის მეშვეობით, რომელიც ტურიზმის ხელშეწყობისთვის გამოყოფს გრანტს 10000 ევროს დაფინანსება მოვიპოვე, კოტეჯების კეთილმოწყობისთვის, თუმცა ხანძრის შემდეგ შევცვალე თანხის მიზნობრიობა. მადლობა ღმერთს დამიმტკიცეს ეს ცვლილება და  გავაკეთე სახანძრო უსაფრთხოების სისტემა. 

მშვენიერი. ელენე, სამომავლო გეგმებზეც გვესაუბრე ცოტა.

ძალიან ბევრი გეგმაა, თუმცა ალბათ ქვეყანაში არსებულ კრიზისულ პერიოდზეც ძალიან ვართ დამოკიდებულები მითუფრო მცირე ბიზნესები... 

პირადად მე ძალიან მინდა რომ კიდევ უფრო დავხვეწო ინტერიერი, ასევე ტერასის გაკეთება მსურს, სადაც განტვირთვისთვის და დასვენებისთვის ძალიან კარგი გარემო იქნება. სტუმრების სურვილიდან გამომდინარე გეგმაშია, რომ  საუნა და ჯაკუზიც გავაკეთო. 

ასევე რაც ძალიან მნიშვნელოვანია მინდა, რომ ადაპტირებული კოტეჯიც ავაშენო, ამას აუცილებლად გავაკეთებ, სამწუხაროდ აქამდე ვერ შევძელი. 

ელენე, მსხვილ ბიზნესებთან თანამშრომლობის გამოცდილება თუ გქონიათ და რას ფიქრობთ რითი შეუძლიათ მათ თავიანთი კორპორაციული პასუხისმგებლობის ფარგლებში მცირე ბიზნესების მხარდაჭერა? 

სამწუხაროდ ამ დრომდე არ გვქონია ამის გამოცდილება, არ ყოფილა დაინტერესება და მეც არ მიმუშავია ამ კუთხით აქტიურად, თუმცა რა თქმა უნდა ძალიან მნიშვნელოვანია. პარტნიორობით, თანამშრომლობით ბევრი რამის გაკეთება შეიძლება. ყველა ტიპის მხარდაჭერა ღირებულია ჩვენთვის. ჯაჭვი უნდა შეიკრას, მე იმას შემიძლია დავეხმარო ვისაც ჩემი რესურსი გაწვდება, მსხვილ ბიზნესსაც ანალოგიურად... ჩვენ ღია ვართ თანამშრომლობისთვის. 

მადლობა ელენე, წარმატებებს გისურვებთ! 

ესაუბრა: გვანცა გილაური