The World Bank's Environmental and Social Standards
მსოფლიო ბანკის გარემოსდაცვითი და სოციალური სტანდარტები

მსოფლიო ბანკის გარემოსდაცვითი და სოციალური სტანდარტები არის შემადგენელი ნაწილი მსოფლიო ბანკის გარემოსდაცვითი და სოციალური ჩარჩოსტრატეგიისა  (The Environmental and Social Framework /ESF), რომელიც 2018 წლის ოქტომბრიდან შევიდა ძალაში და შეეხება მსოფლიო ბანკის ყველა (ამ პერიოდის შემდგომ) საინვესტიციო პროექტის დაფინანსებას. ეს სტრატეგია შესაძლებლობას აძლევს მსოფლიო ბანკს უკეთ მართოს დაფინანსებული პროექტების სოციალური და გარემოსდაცვითი რისკები და გააუმჯობესოს შედეგები.

ბანკის გარემოსდაცვითი და სოციალური ჩარჩოსტრატეგია  მოიცავს სოციალური და გარემოსდაცვითი საკითხების ფართო სპექტრს და ყურადღებას ამახვილებს გამჭვირვალობაზე, დისკრიმინაციის აღმოფხვრაზე, საზოგადოების თანამონაწილეობასა და ანგარიშვალდებულებაზე (საჩივრის მექანიზმების ჩათვლით). აღნიშნული ჩარჩოსტრატეგია მოიცავს შემდეგ კომპონენტებს:

• მსოფლიო ბანკის ხედვა მდგრადი განვითარების შესახებ;
• მსოფლიო ბანკის გარემოსდაცვითი და სოციალური პოლიტიკა საინვესტიციო პროექტების დაფინანსებისთვის (IPF);
• მსოფლიო ბანკის გარემოსდაცვითი და სოციალური სტანდარტები - 10 სტანდარტი;
• მსოფლიო ბანკის ორი დირექტივა - გარემოსდაცვითი და სოციალური დირექტივა საინვესტიციო პროექტების დაფინანსებაზე და მოწყვლად და დაუცველ ჯგუფებთან და ინდივიდებთან დაკავშირებული რისკებისა და ზეგავლენების მართვის შესახებ.

სოციალური და გარემოსდაცვითი ჩარჩოსტრატეგია (ESF) ეხება მსოფლიო ბანკის ყველა (ამ პერიოდის შემდგომ) საინვესტიციო პროექტის დაფინანსებას 2018 წლის ოქტომბრიდან. რაც შეეხება უკვე მიმდინარე პროექტებს, რომლებსაც მიესადაგება მსოფლიო ბანკის  Safeguard Policies, ორივე სისტემა პარალელურად იმუშავებს 7 წლის განმავლობაში.

მსოფლიო ბანკის გარემოსდაცვითი და სოციალური სტანდარტები აყალიბებს ძირითად ვალდებულებებს სოციალურ და გარემოსდაცვით სფეროებში მსოფლიო ბანკის მსესხებელთათვის. ისინი მოიცავს შემდეგ 10 სტანდარტს:

1. სოციალური და გარემოსდაცვითი რისკებისა და ზეგავლენების შეფასება და მართვა;
2. დასაქმება და სამუშაო პირობები;
3. რესურსების ეფექტური გამოყენება, დაბინძურების პრევენცია და მართვა;
4. საზოგადების/თემის ჯანმრთელობა და უსაფრთხოება;
5. მიწის შესყიდვა, შეზღუდვები მიწის გამოყენებასა და იძულებით განსახლებაზე;
6. ბიომრავალფეროვნების დაცვა და მდგრადი მართვა;
7. მკვიდრი მოსახლეობა/სუბსაჰარული აფრიკის ისტორიულად დისკრიმინირებული ტრადიციული ადგილობრივი თემები;
8. კულტურული მემკვიდრეობის დაცვა;
9. ფინანსური შუამავლების საქმიანობა;
10. დაინტერესებულ მხარეთა ჩართულობა და ინფორმაციის გახსნა

იხილეთ წყარო